«Ҳафтаи китоби кӯдак» 70 — сола шуд

Душанбе, 08.04.2014.(АМИТ «Ховар», Ҳотами  Шариф).-Имрӯзҳо фестивали ҷумҳуриявии «Ҳафтаи китоби кӯдакону наврасони Тоҷикистон» дар кулли  манотиқи кишвар хеле пурмуҳтаво идома дорад. Боиси хушнудист, ки ин чорабинии фарҳангӣ ҳар сол бо мазмуну муҳтавои нав хеле шавқовару муфид ва диққатҷалбкунанда доир мегардад. Фестивали мазкур таърихи 70-сола дорад. Соли 1944 дар айёме, ки аз саросари Иттиҳоди Шӯравӣ бӯи дуд, бӯи хун меомад, ба сари нависандаи машҳури рус Лев Кассил фикри наҷибе пайдо шуд. Фикре, ки робитаи кӯдаконро ба китобхона, ба мактаб қавӣ ва муҳаббати онҳоро бо китоб афзун созем. 
Бо ҳамин мақсад гурӯҳе аз кӯдакон ва як зумра ҳамқаламони хешро дар толори Иттифоқи нависандагони Шӯравӣ ҷамъ оварда, чорабинии ҷолибу рангинеро бо номи «Ҳафтаи китоби кӯдак» доир намуд. Сипас, таҷлили он дар як сатҳи баланди фарҳангӣ ба ҳукми анъана даромаду ба ҳафтаи ошноӣ, ба ҳафтаи тарғиби адабиёти ҷумҳурии бародар мубаддал гашт, ки то ҳанӯз идома дорад.