Ҳушдори шаҳрдорӣ ба масъулини сохторҳо

   Душанбе, 29.04.2014.(АМИТ «Ховар», Марзия Саидзода).-Раиси шаҳри Душанбе Маҳмадсаид Убайдуллоев  зимни баргузории ҷаласа ба муовинонаш,  роҳбарони сохторҳои шаҳрӣ, хусусан масъулини Ситод оид ба ҳолатҳои фавқулода ва мудофиаи граждании пойтахтро ҳушдор додааст, ки бо ҷалби  иқтидори мавҷуда коршоямии иншооти селпарторо дар пойтахт таъмин сохта, дар ҳамоҳангӣ барои тақвияти фаъолияти ситодҳои амалкунанда тадбирҳои таъхирнопазир андешанд.  
Инчунин шаҳрдорӣ масъулини Муассисаи давлатии “Раёсати сохтмон, навсозӣ ва таъмири асосию ҷории роҳҳою кӯпрукҳои ҳудуди марзию маъмурии шаҳри Душанбе”-ро муваззаф намудааст, ки ҳангоми таҳияи ҳуҷҷатҳои лоиҳавии иншооти сохтмон, навсозӣ ва таъмири асосию ҷории роҳҳо бунёди ҷӯйборҳои оҳану бетонӣ ва селпартоҳоро бо инобати иқтидори  ғунҷоиши баланди селгузаронӣ тарҳрезӣ намоянд.