Ҷаласаи Қосими Роҳбар ва натиҷаҳои семоҳа
Душанбе, 18.04.2014. (АМИТ «Ховар», Зарангези Латиф).- Дирӯз дар Вазорати кишоварзии ҷумҳурӣ маҷлиси ҳайати мушовара «Оид ба натиҷаҳои ҷамъбасти фаъолияти Вазорати кишоварзӣ дар семоҳаи аввали соли 2014 ва вазифаҳои минбаъдаи кормандони соҳа» доир гардид.
Вазири кишоварзӣ Қосим Роҳбар оид ба ҷамъбасти натиҷаҳои фаъолияти вазорат ва камбудиҳои соҳа дар семоҳаи аввали соли ҷорӣ сухан гуфта, аз ҷараёни кишту кори баҳории зироатҳои кишоварзӣ, истифодаи техника, рушди соҳаи чорводорӣ ва дигар масъалаҳои муҳими соҳа, аз сардорони раёсатҳои кишоварзии вилояту ноҳияҳо ва раёсату шуъбаҳои дахлдори вазорат пурсон шуда, ба онҳо барои рафъи камбудиҳои соҳа дастуру супоришҳои мушаххас дод.
Тавре ки аз хадамоти матбуоти вазорат иттилоъ доданд, дар раванди кори ҷаласа масъалаи «Рафти амалигардонии қисматҳои лоиҳаи инвеститсионии «Беҳдошти сатҳи зиндагӣ дар вилояти Хатлон» ва Муассисаи давлатии лоиҳаи «Рушди чорводорӣ ва чарогоҳҳо» мавриди пурсиш ва масъалагузорӣ қарор гирифт.