15 май – Рӯзи ягонаи футболи оммавӣ

Душанбе, 09.04.2014. (АМИТ «Ховар). —  Конфедератсияи футболи  Осиё  ба  ҳамаи иттиҳодияҳои  миллиаш  хабар  дод, ки  15  майи  соли  ҷорӣ  Рӯзи  дуюми  ягонаи  футболи оммавии Конфедератсия  баргузор  мегардад. 
Тавре  ки  аз  Федератсияи  футболи  Тоҷикистон  хабар  доданд, Конфедератсияи  футболи  Осиё  барои  рушди  футболи оммавӣ   саъю  кӯшиши  зиёдеро  ба  харҷ  медиҳад.  Конфедератсия сар  аз соли  гузашта ҳар  сол  таҷлили Рӯзи  футболи оммавиро   роҳандозӣ  менамояд, ки   мақсад  аз  он ҷалби  таваҷҷӯҳ ба  мақоми  бузурги соҳаи  футбол  аст. 
Дар маъракаи  доир  намудани Рӯзи  футболи оммавӣ  ҳамаи  47 ассотсиатсияи  аъзои Конфедератсияи  футболи  Осиё  иштирок  менамоянд. Азбаски  15  май  ба рӯзи  панҷанбе  рост  меояд, Конфедератсия  ба  ҳамаи иттиҳодияҳои  миллӣ  хабар  дод, ки онҳо  метавонанд  Рӯзи  футболи оммавиро дар  ҳамин рӯз, ё  дар рӯзҳои истироҳат ҷашн  гиранд.
Хотирнишон  месозем,  ки  Тоҷикистон  соли 2014 – ро Соли футболи оммавӣ  эълон  кардааст. Моҳи  гузашта дар  шаҳри  Душанбе дар  саросари  ҷумҳурӣ ҷашнвораҳо  бахшида ба  футболи оммавӣ  баргузор  шуданд, ки дар  онҳо  беш  аз 250  нафар  кӯдакон  низ иштирок  доштанд. Дар  маросими  оғози Соли  футболи оммавӣ  дар  Тоҷикистон  президенти  Федератсияи футболи  ҷаҳон  Йозеф  Блаттер  ширкат  дошт.
«Мо  чунин  ибтикоротро,  аз  қабили Соли  футболи оммавӣ  дар  Тоҷикистон, бо  камоли  ифтихор  дастгирӣ  менамоем, зеро  ин  чорабинӣ  саҳми  арзандае ба рушди  футбол дар  тамоми  ҷаҳон ба  шумор  рафта, ба  рушди футболи  занона  низ таъсири  мусбат  мерасонад», —  гуфт Йозеф  Блаттер.