161 ҳолати қонуншиканӣ дар се моҳ

 
Душанбе, 23.04.2014. (АМИТ «Ховар», Мавҷуда Анварӣ). —  Мутобиқи маълумоти Шӯрои адлияи Ҷумҳурии Тоҷикистон дар семоҳаи аввали соли 2014 аз ҷониби комиссияҳои доимии танзими анъана ва ҷашну маросимҳо 161 парванда оид ба вайрон намудани талаботи Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» тартиб дода шуда, ҷиҳати чораандешӣ ба судҳо ирсол шудааст, ки маблағи умумии ҷаримаи он 594 ҳазору 500 сомониро ташкил медиҳад. 
Дар ин давра дар вилояти Хатлон 57, вилояти Суғд 69, шаҳри Душанбе 18 ва дар шаҳру навоҳии тобеи марказ 17 ҳолати нақзи қонун ба қайд гирифта шудааст. Аз ҷумла, аз тарафи Раёсати танзими анъана ва ҷашну маросимҳои Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон 19 ҳолати қонуншиканӣ ошкор ва парвандаҳои ҳуқуқвайронкунии маъмурӣ тартиб дода шуданд.