198 нафар зан дар қайди маркази наркологӣ

Душанбе, 10.04.2014. (АМИТ «Ховар», Муқаддас Темурзода).-Кормандони Агентии назорати маводи нашъаовари назди Президенти ҶТ 9 апрел дар Донишкадаи тиҷорати Тоҷикистон бо донишҷӯдухтарон ва волидони онҳо вохӯрӣ гузарониданд.Ҳангоми суҳбати ошкоро мутахассисони агентӣ оид ба масъалаҳои мубрами рӯз, аз ҷумла, пешгирии наврасону ҷавонон аз истеъмол ва хариду фурӯши маводи нашъадор, шомилшавӣ ба гурӯҳҳои террористӣ, экстремистӣ, ифротгароӣ, ҳизбу ҳаракатҳои тундрав, задухӯрди гурӯҳҳо, ҷинояткориву ҳуқуқвайронкунӣ сухан ронданд. Инчунин нисбат ба зарари истеъмоли мухаддирот ба инсон, оқибатҳои ҳуқуқию иҷтимоӣ ва тиббии сӯйистеъмоли маводи нашъадор маълумот доданд.Зикр шуд, ки мутаассифона, баъзан ба истеъмоли маводи нашъаовар ҷавондухтарон ва занон ҷалб мешаванд.Тибқи омори расмии Вазорати тандурустӣ имрӯз 198 нафар зан дар қайди маркази наркологӣ мебошад ва тамоми масъулине, ки дар самти корҳои фаҳмондадиҳӣ фаъолияти беандоза доранд, кӯшиш менамоянд, ки ҳар чӣ бештар бо роҳҳои фаҳмондадиҳӣ, пешгирӣ ва тарғиботи тарзи ҳаёти солим дар тамоми шаҳраку ноҳияҳо оид ба пешгирии масъалаҳои номбурда бо ҷомеа, хусусан бо занон ва ҷавондухтарон суҳбату мулоқот баргузор намоянд.Дар вохӯрӣ намояндагони Кумитаи ҷавонон, варзиш ва сайёҳӣ, шуъбаи кор бо занон ва оила, ҳукуматҳои навоҳии пойтахт иштирок намуданд.Дар ин бора ба АМИТ «Ховар» аз маркази матбуоти АНМН иттилоъ доданд.