2,4 баробар афзудани ҷинояткорӣ дар Ваҳдат
Душанбе, 18.04.2014. (АМИТ «Ховар», Мавҷуда Анварӣ). — Сарвари Давлат Эмомалӣ Раҳмон зимни сафари кориаш ба шаҳри Ваҳдат, ки 15 апрели соли ҷорӣ сурат гирифт, иброз намуд, ки бо вуҷуди тадбирҳое, ки андешида шудаанд, доир ба тарбияи наврасону ҷавонон ва пешгирӣ кардани қонуншиканӣ дар байни онҳо дар семоҳаи якуми соли 2014 сатҳи ҷинояткорӣ дар байни ҷавонону наврасони шаҳри Ваҳдат 2,4 баробар афзудааст. Хусусан ба ҷиноятҳои вазнин, аз ҷумла гардиши ғайриқонунии маводи мухаддир, гаравидани баъзе ҷавонон ба ҳизбу ҳаракатҳои экстремистӣ ва гурӯҳҳои террористӣ боиси ташвишу нигаронии ҷиддӣ мебошад.
Бинобар ин, бори дигар бояд таъкид сохт, ки ба тарбияи насли ҷавон муносибати бисёр ҷиддӣ ва масъулона зоҳир намоянд, чунки ин вазифаи роҳбарону фаъолон, устодону омӯзгорон, падару модарон, зиёиён ва умуман ҳамаи табақаҳои ҷомеа мебошад.
Вобаста ба ин, мақомоти иҷроияи ҳокимияти давлатии шаҳри Ваҳдат вазифадор аст, ки ҷиҳати татбиқи барномаҳои маҳаллии сиёсати ҷавонон тадбирҳои муассирро амалӣ намояд.