644 оила ихтиёрӣ кӯчонида мешавад
Душанбе, 16.04.2014. (АМИТ «Ховар», Лайло Тоирӣ).- Дар семоҳаи аввали соли 2014 корҳо дар самти муҳоҷирати дохилӣ вусъат мегиранд.
Тибқи Қарори Ҳукумати Ҷумҳурии Тоҷикистон соли 2014 дар ҷумҳурӣ 644 оила ихтиёрӣ кӯчонида шавад, аз ҷумла дар ВМКБ 20 оила, дар вилояти Хатлон — 256 оила, вилояти — Суғд 146 оила ва навоҳии тобеи ҷумҳурӣ 222 — оила.
Тибқи маълумоти шуъбаи робита бо ҷомеаи Хадамоти муҳоҷирати Вазорати меҳнат, муҳоҷират ва шуғли аҳолӣ, мақомоти иҷроияи ҳокимияти давлатии вилоятҳо ва шаҳру ноҳияҳои ҷумҳурӣ дар муҳлатҳои муайяншуда тибқи нақша рӯйхати аниқшудаи муҳоҷиронро барои маблағгузорӣ ва кӯчонидани онҳо дар давоми соли 2014 пешниҳод карданд. Рӯйхати таҳияшуда аз ҷониби вазири меҳнат, муҳоҷират ва шуғли аҳолии Ҷумҳурии Тоҷикистон 23 январи соли равон тасдиқ шуд.
Тибқи маълумоти фаврии мақомоти иҷроияи маҳаллии ҳокимияти давлатии вилоятҳо ва шаҳру ноҳияҳои қабулкунандаи муҳоҷирон дар айни замон кор дар самти қабули қарори замини наздиҳавлигӣ барои сохтмони манзили истиқоматии муҳоҷирон мавриди баррасӣ қарор дошта, дар як қисм ноҳияҳо аллакай қарори замин тасдиқ шудааст.