Бардоштҳои илмӣ дар тарозуи илмсанҷӣ

Душанбе,03.04.2014. (АМИТ «Ховар», Раъно Нусратуллозода).-Китоби номзади илмҳои педагогӣ  Маҳмадулло Раҷабов «Пажӯҳишшиносӣ дар илмсанҷӣ» зери назари профессор С.Сулаймонӣ дар нашриёти «Ирфон»аз чоп баромад.
Китоб аз ду боб иборат буда, боби аввал дар бораи масъалаҳои корбурди пажӯҳиш: равиш, интихоби мавзӯъ,  суратбандии масъала,  тарҳи муқаддимотӣ,  китобшиносии муқаддимотӣ,  ёддоштбардорӣ,  тарҳи ниҳоӣ, таҳияи дастнавиштаи муқаддимотӣ, понавис,  бознигарии дастнавишта, ҷузъиёти навиштаи таҳқиқӣ,  риояти ахлоқи таҳқиқӣ ва  бахши пайваст, дар боби дувуми китоб масъалаҳои назарии пажӯҳиш, муҳимияти масъалаҳои илмсанҷии педагогӣ,  илмсанҷӣ дар пояи усули ҳисоби интишорӣ, масъалаҳои илмсанҷӣ дар пажӯҳишҳои педагогӣ, омӯзиши ақидаҳои педагогии Садриддин Айнӣ дар солҳои 50-70-уми садаи ХХ: тадқиқи илмсанҷӣ, шӯроҳои диссертатсионӣ, зарурияте ба таҳқиқоти  илмсанҷӣ, роҳнамоии дониш, ҷустуҷӯи илмӣ дар манбаъҳои иттилоотии муосир  баррасӣ гардиданд.
Ба гуфти академик Сафар Сулаймонӣ дар китоб ба масъалаи равиш  ишора  шудааст, ки он қисмате аз огоҳиҳои башариро ба худ мегирад ва аз дониши айнии башар дар бораи падидаҳое, ки ба равиши илмӣ мавриди баррасӣ ва қабул воқеъ гардида, нашъат гирифтааст.
Шинохти равишҳо аз  самтҳои мантиқии андеша ба сурати аслӣ гуфтор карда, мафоҳими асосӣ ва  василаи  ақлонии равишҳоеро, ки барои расидан ба ҳадди лозимӣ заруранд,  таъйин мекунад.
Китоб   роҳнамоест барои расидан бар ин ҳадафи муқаддас, дар таҳқиқу пажӯҳиш ва илмсанҷӣ.