Баррасии масоили ҷаҳонӣ миёни Ш. Мирзо ва С. Шойгу

Душанбе, 3.04.2014. (АМИТ «Ховар», Лайло Тоирӣ).-  Вазири мудофиаи Ҷумҳурии Тоҷикистон генерал-лейтенант Шералӣ Мирзо 1 апрели соли 2014 бо вазири мудофиаи Федератсияи Русия генерали артиш Сергей Шойгу, ки баҳри иштирок дар ҷаласаи навбатии вазирони мудофиаи кишварҳои аъзои Созмони ҳамкории Шанхай ба Тоҷикистон  омада буд, мулоқоти дуҷониба анҷом дод.
 Сергей Шойгу ба Шералӣ Мирзо барои дар сатҳи баланд ташкил намудани ҷаласаи навбатии вазирони мудофиаи кишварҳои аъзои Созмони ҳамкории Шанхай дар Тоҷикистон арзи сипос карда, оид ба муносибатҳои ду кишвари ба ҳам дӯст дар доираи низомӣ изҳори андеша кард. Дар вохӯрӣ инчунин вазъи кунунӣ ва дурнамои муносибатҳои дӯстӣ ва ҳамкориҳои самарабахши низомии Тоҷикистону Русия баррасӣ шуд. Аз тасвиби созишномаҳои муҳими ҳамкорӣ дар соҳаҳои ҳарбӣ ва ҳарбию техникӣ, омодакунии кадрҳои низомӣ, табодули иттилооту таҷрибаомӯзӣ дар муборизаи муштараки зидди террористӣ ва дигар санадҳои дуҷонибаву бисёрҷониба, ки дар сатҳи сарони ду кишвар ба мувофиқа расидаанд, изҳори қаноатмандӣ  шуд. 
Бино ба иттилои хадамоти матбуоти Вазорати мудофиа, дар вохӯрӣ ҳамчунин масоили мубрами минтақавию ҷаҳонӣ, аз ҷумла бехатарӣ дар минтақаи Осиёи Марказӣ мавриди баррасӣ сурат гирифт.