Дурнамои фаъолияти Ассотсиатсияи миллии волонтёрон

Душанбе, 2.04.2014. (АМИТ «Ховар», Зарангези Латиф).- Пагоҳ, 3-юми апрели соли ҷорӣ дар бинои Маркази тадқиқоти стратегии назди Президенти Ҷумҳурии Тоҷикистон нишасти матбуотӣ оид ба таъсис ва муаррифии дурнамои фаъолияти Ассотсиатсияи миллии волонтёрони Тоҷикистон баргузор мегардад
Ёдрас мекунем, ки 20-уми феврали соли равон бо ташаббуси Иттиҳодияи ташкилотҳои ҷавонони Тоҷикистон (ба он 117 ташкилот аъзост) ва шаш ташкилоти ҷамъиятӣ бо мақсади рушду такомули фаъолияти волонтёрӣ ва фароҳам овардани шароитҳо барои дар амал татбиқ намудани Қонуни Ҷумҳурии Тоҷикистон «Дар бораи фаъолияти волонтёрӣ» Ассотсиатсияи миллии волонтёрони Тоҷикистон (Ассотсиатсия) таъсис дода шуд.
Ҳадафи асосии Ассотсиатсия ба беҳдошти вазъи иҷтимоии аҳолии Тоҷикистон, бахусус дастрасии гурӯҳҳои осебпазир ба шуғлнокӣ, таҳсилот, саломатӣ ва таъминоти иттилоотӣ ва ҳуқуқӣ ва мусоидат барои иштироки фаъоли ҷомеаи шаҳрвандӣ дар демократикунонии ҷомеа бо роҳи рушди ҳаракати волонтёрӣ дар кишвар нигаронида шудааст.
Дар ин бора аз Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон хабар доданд.