Душанбе ва Остона -тавсеаи равобити парлумонӣ
Душанбе, 18.04.2014.(АМИТ “Ховар”, Марзия Саидзода).- “Байни Тоҷикистону Қазоқистон 70 созишномаи байнидавлатӣ ба имзо расидааст, ки ин санадҳо заминаи муносиботи гуногунсоҳаи Душанбе ва Остонаро тақвият мебахшанд”, -гуфт зимни мулоқоташ раиси Маҷлиси намояндагони Маҷлиси Олии Ҷумҳури Тоҷикистон Шукурҷон Зуҳуров бо Кабибулло Ҷакупов- раиси палатаи поёнии Парлумони Қазоқистон дар Санкт-Петербург.
Мусоҳибон бо дахли масоили марбут ба ҳамкориҳои парлумонӣ зикр карданд, ки ҷиҳати тақвияти ин ҳамкориҳо бояд сафарҳои ҳайати парлумонии ҳар ду кишвар ба роҳ монда шавад. Он имкон медиҳад, то таҷрибаи ҳамдигар дар самти таҳия ва омода намудани қонун ва дигар санадҳо омӯхта шавад.
Ш. Зуҳуров зикр кард, ки Тоҷикистон нисбат ба Қазоқистон назари некбинона дорад. Зикр гардид, ки алҳол дар Тоҷикистон беш аз 40 корхонаи муштараки Тоҷикистону Қазоқистон фаъолият дорад. Моро лозим аст, ки имкониятҳои мавҷудаи иқтисодии кишварҳоямонро бештар истифода барем, таъкид кард раиси палатаи поёнии Парлумони Тоҷикистон.
Мусоҳибон ҳамзамон масоили марбут ба тавсеаи ҳамкориҳо дар доираи созмонҳои байналмилаливу минтақавӣ, иқтисод, энергетика, кишоварзӣ, илму фарҳанг, техника ва авзои минтақаро баррасӣ карданд. Дар фарҷоми мулоқот Кабибулло Ҷакупов аз Шукурҷон Зуҳуров даъват ба амал овард, ки дар фурсати барояш муносиб ба Қазоқистон сафар намояд.