Э. Раҳмон: Таъминкунандаи пешрафту ояндаи мамлакат- соҳаи маориф

Душанбе, 17.03.2014. (АМИТ «Ховар», Зарангези Латиф).-«Яке аз самтҳои калидӣ ва таъминкунандаи пешрафти ояндаи мамлакат соҳаи маориф буда, барои бунёди инфрасохтори замонавии таълиму тарбия ва мутобиқсозии раванди таълим ба меъёрҳои ҷаҳонии таҳсилот мо тамоми имкониятҳои худро сафарбар кардаем, зеро ки соҳаи маориф ояндаи миллат ва давлатро тарбия мекунад»,- гуфт Сарвари мамлакат Эмомалӣ Раҳмон зимни мулоқот бо роҳбарону фаъолони шаҳри Ваҳдат.
Ҳамчунин Эмомалӣ Раҳмон зикр намуд, ки солҳои охир дар шаҳри Ваҳдат 7 бинои нави таълимӣ ва 144 синфхонаи иловагӣ бо зиёда аз 10 ҳазору 600 ҷойи нишаст ба истифода дода шуда, ҳоло сохтмони се мактаб идома дорад ва тибқи нақша то оғози соли нави хониш ду мактаби нав барои қариб 5000 ҷойи нишаст дар ду баст ба истифода дода мешавад.
Сарвари Давлат Эмомалӣ Раҳмон таъкид намуд, ки омӯзгорону устодони ҳамаи муассисаҳои таҳсилотӣ зарур аст, ки дар ҷараёни таълим кӯшиш намоянд, то мактабро танҳо барои гузаронидани машғулиятҳои фаннӣ маҳдуд накарда, дар баробари таълим ба масъалаи тарбияи ҳамаҷонибаи ҷавонону наврасон, бахусус ба тарбияи ватандӯстӣ ва баланд бардоштани ҳисси миллии онҳо эътибори аввалиндараҷа диҳанд.