Эмомалӣ Раҳмон : Омӯзгор дар ҷомеаи мо мақоми хосса дорад

Душанбе, 23.04.2014. (АМИТ «Ховар», Зарангези Латиф).- Омӯзгор дар меҳвари соҳаи маориф қарор дорад ва сатҳу сифати дониши шогирдон ва тарбияи шоистаи онҳо маҳз ба донишу таҷриба, малакаву маҳорати касбӣ, усули таълим ва дигар паҳлӯҳои фаъолияти шахсии омӯзгор вобастагии зич дорад,- гуфт Сарвари Давлат Эмомалӣ Раҳмон зимни суханронӣ  дар Паёми навбатии хеш ба Маҷлиси Олӣ.
Ҳамчунин  зикр гардид, ки соли гузашта Қонуни Ҷумҳурии Тоҷикистон «Дар бораи маориф» дар таҳрири нав қабул гардид ва дар ин қонун нахустин бор ба мақоми омӯзгор боби алоҳида бахшида шуд.
Президенти мамлакат  таъкид намуд, ки мо бори дигар нишон додем, ки омӯзгор дар ҷомеаи мо мақоми хосса дорад.
Тибқи ин қонун барои  омӯзгорон имтиёзҳои зиёде пешбинӣ шудаанд ва ман аз тамоми масъулини Ҳукумат ва мақомоти иҷроияи маҳаллии ҳокимияти давлатӣ талаб менамоям, ки иҷрои бечунучарои муқаррароти қонуни мазкурро таъмин созанд, — таъкид намуд Президенти кишвар Эмомалӣ Раҳмон.