Хатлон нахустихтиёриёнро ба артиш фиристод
Душанбе, 04.04.2014. (АМИТ «Ховар, Мурод Сотиев). — 3 апрел 100 нафар ихтиёриёни ноҳияҳои вилояти Хатлон барои адои хидмат дар сафҳои Қувваҳои мусаллаҳи Ҷумҳурии Тоҷикистон фиристода шуданд.
Маросими гусели даъватшавандагон бо иштироки роҳбарияти вилояти Хатлон, волидайн ва хешу табори онҳо, собиқадорони ҷангу меҳнат, ҳамчунин намояндагони аҳли ҷомеа сурат гирифт.
Раиси вилоят Давлатшо Гулмаҳмадов зикр намуд, ки хидмат дар сафҳои Қувваҳои мусаллаҳ вазифаи ҳар шаҳрванди кишвар аст.
Раиси вилоят ҳамчунин иброз дошт, ки теъдоди ихтиёриёне, ки хоҳиши адои хидмат дар сафҳои Қувваҳои мусаллаҳи кишварро доранд, бамаротиб меафзояд.
Дар маросими ботантанаи гусели ихтиёриён аз номи роҳбарияти вилояти Хатлон ба онҳо туҳфаҳои хотиравӣ тақдим шуданд.
Давлатшо Гулмаҳмадов хамчунин бо кори комиссияи вилоятии даъват ба сафҳои артиш шинос шуд.