Хуҷанд: Насби таҷҳизоти тиббӣ бо арзиши 1 млн. $
Душанбе, 16.04.2014. (АМИТ «Ховар», Зарангези Латиф).-Дар бахши хуҷандии бемористони Ибни Сино дастгоҳи нави олмонии «Ангиография» васл гардид.
Ба иттилои сомонаи мақомоти иҷроияи ҳокимияти давлатии шаҳри Хуҷанд дар маросими ба фаъолият оғоз кардани ин таҷҳизоти дилшиносӣ раиси шаҳри Хуҷанд Раҷаббой Аҳмадзода низ иштирок намуд.
Арзиши ин дастгоҳ 1 миллион доллари ИМА буда, он дар Олмон истеҳсол шудааст. Ба гуфтаи муовини директори беморхонаи Ибни Сино Сарҳад Бобоалиев дастгоҳи мазкур хусусан барои муайян кардани бемориҳои рагҳои узвҳои бадан ва ишемияи дил муфид буда, минбаъд ба воситаи ин таҷҳизот гузаронидани ҷарроҳии дил низ дар назар дошта шудааст.
Ёдрас мекунем, ки беморхонаи ибни Сино 22-марти соли 2013-ум ба фаъолият шурӯъ намуд ва дар он асосан маризоне, ки бемории қалб доранд, табобат мегиранд.