Ифтитоҳи маркази иттилоотӣ-омӯзишӣ
Душанбе, 10.04.2014.(АМИТ “Ховар”, Марзия Саидзода).- Ҷамъияти Ҳилоли Аҳмари Тоҷикистон /(ҶҲАТ/ бо дастгирии Намояндагии Федератсияи байналмилалии ҷамъиятҳои Салиби Сурх ва Ҳилоли Аҳмар дар Тоҷикистон /ФБҶ СС ва ҲА/) имрӯз дар шаҳри Қӯрғонтеппа нахустин Маркази иттилоотӣ-омӯзишии худро барои муҳоҷирони корӣ ва аҳли хонадони онҳо ифтитоҳ кард. Дар марказ муҳоҷирони эҳтимолии корӣ, муҳоҷирони бозгашта, инчунин аҳли хонадони онҳо имкон доранд, ройгон машваратҳо дар мавзӯи ВИЧ/СПИД ва ҳаққи қонунии дастрасӣ ба хидматгузориҳои тиббӣ дар Русия машваратҳои ҳуқуқӣ бигиранд. Инчунин ройгон забони русӣ ва кор бо роёна ва барномаҳои тозатарини фанновариҳои иттилоотӣ барои тамос бо наздиконашонро биомӯзанд. Маркази мазкур бо дастгирии намояндагии ФБҶ СС ва ҲА дар Тоҷикистон бо маблағгузории созмони ҷамъиятии “СПИДинфосвяз”- и Русия дар доираи барномаи «Мусоидат ба кишварҳои Аврупои Шарқӣ ва Осиёи Марказӣ дар мубориза бо бемориҳои сироятӣ» боз гардид. Ҳадафи лоиҳаи мазкури ҶҲАТ, ки аз ҷониби “СПИД инфосвяз” пуштибонӣ мешавад, баланд бардоштани сатҳи зиндагии муҳоҷирони кории деҳотҷой ва хонадони онҳо ба воситаи беҳтар кардани дастрасии онҳо ба хидматгузориҳои тиббӣ-иҷтимоӣ ва баланд бардоштани огаҳии ҳуқуқияшон аст. Лоиҳа аз ду бахши асосӣ — фаъолияти иттилоотӣ дар миёни аҳолӣ ва ироаи ёрии ташхиси тиббӣ ба мардум аз ҷониби мутахассисиони маҷмаи худрави тиббӣ иборат аст, ки ин қисматро созмони ҷамъиятии “Амирҷон” бар дӯш дорад. Ирина Костетская, муовини раиси “СПИД инфосвяз”, мегӯяд: «Фаъолиятҳои мазкур бахше аз ҳузури Русия дар барномаҳои байналмилалии ёрӣ ба рушд дар соҳаи тандурустӣ ба ҳайси кишвари маблағгузор аст ва дар ҳамкорӣ бо UNAIDS роҳандозӣ мегардад».