Интиқоли барқ дар ҷумҳурӣ зиёд гардид

 
Душанбе, 10.04.2014. (АМИТ «Ховар», Мавҷуда Анварӣ). -Ширкати саҳҳомии холдингии кушода (ШСХК)-и «Барқи тоҷик» интиқоли барқро ба муштариён нисбат ба давраи зимистон қариб ду баробар зиёд кард, вале маҳдудият ҳанӯз пурра барҳам дода нашудааст.
Дар ин бора роҳбари дафтари матбуоти ширкати «Барқи тоҷик» Нозир Ёдгорӣ ба мухбири АМИТ «Ховар» хабар дод. 
Тибқи иттилои манбаъ,  маҳдудияти барқ дар кишвар  вобаста ба вазъи ҳаво ва паст будани сатҳи оби дарёи Вахш мебошад. Дар моҳи апрел ҳарорати миёнаи ҳаво 2-3 дараҷа поён мефарояд ва об шудани пиряхҳо кам ба чашм мерасад.  
Дар робита ба ин ҳавошиносони тоҷик рӯзҳои наздик  сард шудани ҳаворо пешгӯӣ мекунанд. Хусусан аз 11 то 13 апрел ҳарорати ҳаво ҳамагӣ  11-13 дараҷа гарм мешавад.
Дар ҳолати риоя накардани меъёр шаҳрвандони кишвар метавонанд ба телефонҳои боварии «Барқи тоҷик»- 235-86-74, 235-86-84 муроҷиат намоянд.