Китоби нав — тӯҳфа дар Рӯзи осорхонаҳо
Душанбе, 7. 04. 2014. (АМИТ «Ховар», Лайло Тоирӣ).- Ба муносибати Рӯзи осорхонаҳо, ки ҳар сол 18 май ҷашн гирифта мешавад, дар нашриёти «ЭР-граф» аввалин китоби илмиии «Маълумоти осорхонаи милиии Тоҷикистон» аз чоп баромад. Муассиси китоб Муассисаи давлатии «Осорхонаи миллии Тоҷикистон» мебошад.
Дар китоби мазкур маводҳо бо забонҳои тоҷикӣ, русӣ ва англисӣ ҷамъ оварда шудаанд. Дар маҷмӯаи илмӣ рӯйдодҳои таърихӣ, рамзҳо, омӯзиши бостоншиносӣ ва дигар эълонҳои шавқовару таърихӣ интишор шудаанд.
Яке аз маводи тозаи китоб «Коллексияи табарҳои қадимаи нуқрагини Осорхонаи миллии Тоҷикистон» буда, муаллифаш Ю. Яқубов мебошад.
Ҳамчунин асарҳои Н. Раҳимов ва Б. Темирзода «Аломатҳои фарзии Наск ва маъданшинос аз Ашт», Д. Довудӣ «Рушди тангашиносӣ дар Тоҷикистон » ва С. Бобомуллоев «Таърихи омӯзиши бостоншиносии водии Ҳисор» мавриди таъкид қарор дода шудааст.
«Маълумоти осорхонаи милиии Тоҷикистон» барои ҳайати васеи хонандагон, ҳамчунин таърихшиносон, донишҷӯёни факултетҳои таърих ва мутахассисони дар соҳаи осорхона ва таърих фаъолияткунанда пешниҳод шудааст.