КВД «Обу корези Душанбе» ба насби ҳисобкунакҳо шуруъ мекунад
Душанбе, 04.04.2014. (АМИТ «Ховар, Екатерина Пасторова ). – Тавре аз Корхонаи воҳиди давлатии «Обу корези Душанбе» ба АМИТ «Ховар» хабар доданд, дар шаҳри Душанбе 76 ҳазору 500 адад ҳисобкунакҳои об насб карда мешаванд.
Иҷрои ин корҳо дар ҳошияи Лоиҳаи дуюми бо об таъмин намудани шаҳри Душанбе сурат гирифта ва онро Бонки умумиҷаҳонӣ маблағгузорӣ мекунад.
Ҳисобкунакҳои об байни мизоҷони ба қайд гирифташудаи корхонаҳои ноҳияҳои Фирдавсӣ, Сино, Шоҳмансури шаҳри Душанбе ва баъзе маҳаллаҳои ноҳияи Рӯдакӣ ба таври маҷҷонӣ насб карда мешаванд.
Назар ба иттилоои манбаъ, ҳисобкунакҳои об барои истиқоматкунандагони биноҳои бисёрҳуҷрадор дар дохили ҳуҷраҳо ва барои истиқоматкунандагони хонаҳои шахсӣ дар чоҳҳои махсус насб карда мешаванд.
Тавре ки дар КВД «Обу корези Душанбе» қайд намуданд, маъракаи насби ҳисобкунакҳои об то моҳи ноябри соли ҷорӣ давом мекунад.