Маҳфили фарҳангии кӯдакону наврасон дар КМТ
Душанбе, 04.04.2014. (АМИТ «Ховар», Раъно Нусратуллозода).-Имрӯз дар толори кӯдакону наврасони Китобхонаи миллии Тоҷикистон (КМТ) маҳфили доимии фарҳангӣ баргузор гардид. Чорабинии мазкур бо ибтикори Маркази кӯдакон ва наврасони шаҳри Душанбе ва Китобхонаи миллӣ доир гардид. Дар ҷамъомад муовинони директори Китобхонаи миллӣ Ҳуринисо Ализода ва Шариф Комилзода, директори Маркази кӯдакон ва наврасони шаҳри Душанбе Комил Холов сухан гуфта, зикр намуданд, ки ҳадаф аз баргузории маҳфил баланд бардоштани савияи дониш, ҳисси ватандӯстии наврасону кӯдакон, ошноӣ бо фарҳанги миллӣ мебошад.
Дар ҷамъомад аз ҷониби аъзои маҳфили кӯдакону наврасони Китобхонаи миллӣ барномаи фарҳангӣ пешниҳод гардид. Минбаъд чунин чорабиниҳои фарҳангӣ аз ҷониби аъзои маҳфили кӯдакону наврасони китобхонаи миллӣ ва Маркази кӯдакон ва наврасони шаҳри Душанбе мунтазам доир мегарданд.