Муҳокимаи масъалаи идораи маблағҳои давлатӣ
Душанбе, 18.04.2014. (АМИТ «Ховар, Кристина Эрлих). — 17 апрел дар шаҳри Душанбе мулоқоти Вазири молияи Ҷумҳурии Тоҷикистон Абдусалом Қурбонов бо ҳайати Хазинаи байналмилалии асъор таҳти роҳбарии Димитар Радев баргузор гардид.
Назар ба иттилои котиботи Вазорати молияи ҶТ, мулоқот дар вазъияти судманд сурат гирифта, ҷонибҳо масоили арзёбии ислоҳоти ҷорӣ ва дастовардҳои бахши идораи маблағҳои давлатиро баррасӣ намуда, масъалаҳои татбиқи минбаъдаи лоиҳаҳою барномаҳои ба нақша гирифташударо мавриди муҳокима қарор доданд.
Зикр шуд, ки мақсад аз ҳамаи чорабиниҳои Ҳукумати Ҷумҳурии Тоҷикистон иборат аз баланд бардоштани сатҳи некуаҳволии мардуми кишвар аст.
Вазири молияи Ҷумҳурии Тоҷикистон А.Қурбонов ба Д.Радев изҳори миннатдорӣ карда, зикр намуд, ки дар давраи ҳамкорӣ бо Хазинаи байналмилалии асъор, хусусан дар бахши ислоҳоти ниҳодҳои молиявии Ҷумҳурии Тоҷикистон, дастовардҳои назаррас ба даст омаданд.