Мулоқот бо шарики боэътимод

Хоруғ, 14.04.2014. (АМИТ «Ховар», Файз Мирасан).-Раиси  вилояти Мухтори Кӯҳистони Бадахшон Шодихон Ҷамшед намояндаи  баландпояи Оғохони  чаҳорум дар Тоҷикистон Алиакбар Песнаниро  ба ҳузур пазируфт. Дар мулоқот    оид ба ҳамкории ин созмон дар робита ба  дурнамои  рушди   иҷтимоию иқтисодии вилоят, аз ҷумла  тезондани сохтмони Донишгоҳи Осиёи Марказӣ,  дастгирии соҳибкории хурду миёна, пешниҳоди қарзҳои имтиёзноки бонкӣ,  сохтмони толори варзишии муштарак дар маҳалли Теми шаҳри Хоруғ барои варзишгарони тоҷику афғон, толори варзишӣ дар маҳаллаи Хоруғи боло,  дастгирии корхонаҳои истеҳсолӣ,  тамдиди шартномаи «JICA»-и Оҷонсии  рушди Ҷопон,  ислоҳот дар соҳаи тандурустӣ,  мусоидат ба  бозомӯзии касбии мутахассисон ва дигар масоил табодули афкор сурат гирифт. 
    Ҷонибҳо  ҳавасмандии хешро ба иҷрои барномаҳо изҳор дошта, Алиакбар Песнани аз номи  намояндагони  ташкилоти  Оғохон  баён дошт, ки барои амалӣ гаштани барномаҳои аҳамияти иҷтимоӣ-иқтисодӣ дар вилоят бо кумаку ҳамкории ҳукумати кишвар  талош меварзанд.