Мулоқоти Раҷаббой Аҳмадзода бо Саидмаҳдӣ Ибодӣ

Душанбе, 22.02.2014. (АМИТ «Ховар», Зарангези Латиф).-Дирӯз  раиси шаҳри Хуҷанд Раҷаббой Аҳмадзода бо раиси Дафтари намояндагии Кумитаи имдоди Имом Хумайнии Чумҳурии Исломии Эрон дар Ҷумҳурии Тоҷикистон Саидмаҳдӣ Ибодӣ мулоқот намуд.
Ба иттилои Фирдавс Баҳромӣ, масъули Кумитаи имдоди Имом Хумайнӣ зимни суҳбат ҷонибҳо ба мувофиқа расиданд, ки  дар давоми соли 2014 дар шаҳри Хуҷанд 6 коргоҳи омӯзишии сӯзанидӯзӣ ва қолинбофӣ ва ҳамзамон 3 коргоҳи истеҳсолии дӯзандагиро роҳандозӣ намоянд. Дар вохӯрӣ Шоираи халқии Тоҷикистон Фарзона изҳор намуд, ки ду сол қабл дар маркази вилояти Суғд ҳамоиши байналмилалии “Шеъри ҳимоят” баргузор гардид. Алҳол дафтари намояндагии Имом Ҳумайнӣ омода аст, барои бори дигар баргузор намудани ин ҳамоиш дар шаҳри Хуҷанд, ки аз ҷониби шоираи маҳбуб Фарзона пешниҳод шуд, мусоидат намояд.
Раиси шаҳри Хуҷанд омодагии мақомоти иҷроияи ҳокимияти давлатии шаҳрро барои фароҳам овардани шароиту имконият барои ин ҳамоиши байналмилалӣ изҳор намуд.