Намояндаи КФО фаъолияти доваронро арзёбӣ мекунад

Душанбе, 22.04.2014. (АМИТ «Ховар). —  Намояндаи  Конфедератсияи футболи  Осиё  Фарҳод  Абдуллоев  барои  арзёбии фаъолияти  ду  нафар  доварони   ҷавони тоҷик – Насрулло  Кабиров  (Норак) ва Парвиз Муртазоев  (Душанбе)  ба  манзури  дохил  намудани онҳо ба  рӯйхати  боэътимоди  доварони Конфедератсияи  футболи  Осиё  26  апрел  аз  Ӯзбекистон ба  шаҳри  Душанбе  меояд.
Тавре  ки  аз  Федератсияи  футболи  Тоҷикистон  хабар  доданд, корманди ФИФА Фарҳод Абдуллоев ҷараёни  фаъолияти довари  асосии вохӯрии байни дастаҳои «Истиқлол» ва «Энергетик» — и  пойтахт Насрулло Кабировро  назорат  ва  арзёбӣ  мекунад.
Фарҳод  Абдуллоев  ҳамчунин  27  апрел  фаъолияти  довари  ФИФА Парвиз  Муртазоевро  ҳангоми  вохӯрии   байни  дастаҳои ССКА «Помир»  ва  «Регар – ТадАЗ»  мушоҳида  ва  арзёбӣ  менамояд. 
Хотирнишон  месозем, ки  дар  ҳоли  ҳозир аз  Тоҷикистон фақат  довари  ФИФА  Баҳром  Саъдуллоев  аз  шаҳри  Қӯрғонтеппа  ба  рӯйхати боэътимоди  доварони Конфедератсияи  футболи  Осиё  дохил  аст.