Натиҷаҳои сафари расмии С.Аслов ба Туркманистон

Душанбе, 16.04.2014 (АМИТ «Ховар»).- 16 апрели соли 2014 сафари расмии вазири корҳои хориҷии Ҷумҳурии Тоҷикистон Сироҷидин Аслов ба Туркманистон баргузор гардид.
Дар доираи сафари расмӣ вазири корҳои хориҷиро Президенти Туркманистон Гурбангулӣ Бердимуҳаммедов ба ҳузур пазируфт ва инчунин мулоқоти С.Аслов бо муовини раиси Девони вазирон, вазири корҳои хориҷии Туркманистон Рашид Мередов доир гардид.
Дар вохӯриҳо ҷонибҳо вазъ ва дурнамои ҳамкориҳои дуҷонибаро муҳокима карда, оид ба масъалаҳои мубрами байналмилалӣ ва минтақавӣ табодули афкор намуданд. Ҳамчунин тарафҳо ҷанбаҳои сиёсии ҳамкориҳои мутақобиларо дар доираи  созмонҳои байналмилалӣ ва минтақавӣ мавриди баррасӣ қарор доданд.
Мусоҳибон мавқеи ҳамсон доштанд, ки робитаҳои Тоҷикистону Туркманистон дар пояи асосҳои боварӣ, якдигарфаҳмӣ ва ҳамкории шарикӣ асос ёфта, дар тавсеаи онҳо муколамаи сиёсӣ дар сатҳи олӣ нақши муҳимро мебозад.
Ҷонибҳо аҳамияти фаъолияти Комиссияи муштараки байниҳукуматии Тоҷикистону Туркманистон оид ба ҳамкориҳои тиҷоратию иқтисодӣ ва илмию техникиро дар густариши робитаҳо дар соҳаҳои нақлиёт, саноат, энергетика, маориф ва фарҳанг тасдиқ намуда, зарурати истифодаи васеи иқтидори кишварҳоро барои рушди минбаъдаи муносибатҳои дуҷонибаи иқтисодӣ таъкид сохтанд.