Нишасти матбуотии волонтёрон

Душанбе, 3.04.2014. (АМИТ «Ховар», Зарангези Латиф).- Имрӯз дар бинои Маркази тадқиқоти стратегии назди Президенти Ҷумҳурии Тоҷикистон оид ба таъсис ва муаррифии дурнамои фаъолияти Ассотсиатсияи миллии волонтёрони Тоҷикистон нишасти матбуотӣ доир гардид. 
Зимни нишаст дар ҳузури хабарнигорон зикр шуд, ки мақсади асосии Ассотсиатсия ба беҳдошти вазъи иҷтимоии аҳолии Тоҷикистон, бахусус дастрасии гурӯҳҳои осебпазир ба шуғлнокӣ, таҳсилот, саломатӣ ва таъминоти иттилоотӣ ва ҳуқуқӣ ва мусоидат барои иштироки фаъоли ҷомеаи шаҳрвандӣ дар демократикунонии ҷомеа бо роҳи рушди ҳаракати волонтёрӣ дар кишвар нигаронида шудааст.
Ёдрас мекунем, ки 20-уми феврали соли равон бо ташаббуси Иттиҳодияи ташкилоти ҷавонони Тоҷикистон (ки ба он 117 ташкилотҳо аъзо мебошанд) ва шаш ташкилотҳои ҷамъиятӣ бо мақсади рушду такомули фаъолияти волонтёрӣ ва фароҳам овардани шароитҳо барои дар амал татбиқ намудани Қонуни Ҷумҳурии Тоҷикистон «Дар бораи фаъолияти волонтёрӣ» Ассотсиатсияи миллии волонтёрони Тоҷикистон (Ассотсиатсия) таъсис дода шуд.