Омӯзиши курси такмили ихтисос дар кӯдакистони президентӣ

Хуҷанд, 24.04.2014. (АМИТ “Ховар”,Абдуаҳад Шарифзода).-Мураббиёни Муассисаи давлатии кӯдакистони президентии шаҳри Хуҷанд  аз курси такмили ихтисос гузаштанд. Тавре ки сарвари кӯдакистони мазкур Ҷаҳонгирхон Салимов иттилоъ дод, шурӯъ аз аввали моҳи  апрел, тӯли 18 рӯз дар муассисаи номбурда 32 нафар мураббиёни гурӯҳҳои   синнусолӣ аз омӯзишҳои курси такмили ихтисос баҳравард гаштанд. 
Ба гуфти сарвари кӯдакистон, дар ҷараёни омӯзишҳои курси мазкур, роҷеъ ба масъалаҳои  татбиқи сиёсати  давлатӣ дар  бахши  тарбияи  томактабӣ, санаду ҳуҷҷатҳои меъёрию ҳуқуқии соҳа, ҳифзи    саломатии  кӯдакон,  методикаи   гузаронидани   машғулиятҳои  таълимӣ, чорабиниҳои  тарбиявӣ, таҳияи  нақшаҳои  корӣ дарсҳо гузаронида шудаанд. 
Дарсҳо аз тарафи омӯзгорони Донишкадаи такмили ихтисос ва бозомӯзии кормандони соҳаи маорифи вилоят  гузаронида шудаанд. 
Бояд зикр кард, ки омӯзгорону мураббиён ва толибилмони  Кӯдакистони президентӣ яке аз иштирокчиёни фаъоли яксар чорабиниҳои шаҳриву вилояти ба ҳисоб мераванд.