Ошноии муҳоҷирон бо навовариҳои қонунгузории Ф Р

Душанбе, 18.04.2014. (АМИТ «Ховар», Мавҷуда Анварӣ).-  Дар Донишгоҳи омӯзгории Тоҷикистон ба номи С. Айнӣ вохӯрии кормандони раёсати Хадамоти муҳоҷирати Вазорати меҳнат, муҳоҷират ва шуғли аҳолии ҶТ дар шаҳри Душанбе ва навоҳии кишвар бо донишҷӯён ва омӯзгорон дар мавзӯи масъалаҳои муҳоҷирати меҳнатӣ ва тағйиру иловаҳо ба санадҳои меъёрии Федератсияи Русия дар бораи иқомати шаҳрвандони хориҷӣ баргузор гардид.
Сардори бахши таҳлил ва бақайдгирии раёсат Фаридун Сайғуфронов зикр намуд, ки яке аз дастовардҳое, ки дар амалӣ намудани «Стратегияи миллии муҳоҷирати меҳнатии шаҳрвандони ҶТ ба хориҷа барои солҳои 2011-2015» муяссар гардид, ин ба роҳ мондани корҳои иттилоотӣ ва фаҳмондадиҳӣ дар байни муҳоҷирони меҳнатӣ, аъзои оилаи онҳо ва сокинони кишвар дар ҳамаи манотиқи ҷумҳурӣ ва таъмин намудани онҳо бо маводи чопии иттилоотӣ мебошад.
Бояд зикр намуд, ки баъди гузаронидани корҳои иттилотӣ-фаҳмондадиҳӣ оид ба навоварӣ дар қонунгузории муҳоҷирати Федератсияи Русия муроҷиати шаҳрвандон ба Раёсати Хадамоти муҳоҷират зиёд шуда истодааст.
Ф. Сайғуфронов зикр намуд, ки Хадамоти муҳоҷират дар рӯзҳои наздик оид ба тағйиру иловаҳо ба қонунгузории нави Русия дар моҳи январи соли 2014 буклетҳоро бо номҳои “Навовариҳо дар қонунгузории ФР, ки аз 1 январи соли 2014 мавриди амал қарор дода шудаанд”, ба забонҳои давлатӣ ва русӣ чоп намуда, ба муҳоҷирони меҳнатӣ-шаҳрвандони ҶТ дастрас менамояд.