Осоишгоҳ дар Муъминобод

Муъминобод, 8.04.2014. (АМИТ «Ховар», Сулаймони Хол).-Дар ноҳияи Муъминобод   сохтмони бинои осоишгоҳ барои бемороне, ки табобати зиддисилӣ гирифтаанд, оғоз  гардид. Ба иттилои    мудири бахши  меъморӣ ва шаҳрсозии ноҳия  Сафаралӣ  Назаров бинои мазкур бо маблағгузории дирексияи сохтмони назди Ҳукумати ҶТ  ва пудратчӣ- ҶДММ «Иҷоракор»    роҳандозӣ гардида, то ин муддат барои корҳои тарҳрезии бино 2 млн. 300 ҳазор сомонӣ масраф гардидааст.  Мувофиқи лоиҳа бинои мазкур аз ду ошёна иборат буда,   дар дохили бино   утоқҳои кории табибон  бо таҷҳизотҳои тиббии замонавӣ муҷаҳҳаз мегардад.   
Мақсад аз таъсиси бино  бо шароити муносиб фаро гирифтани беморони гирифтори сил ва  бо кори доимӣ таъмин намудани мутахассисони ҷавони соҳаи тиб мебошад.                     Мавриди  зикр аст, ки тайи солҳои охир дар ноҳия корҳои сохтмонӣ рушд ёфта, бо маблағгузории Ҳукумати ҶТ ва  мақомоти иҷроияи ҳокимияти давлатии ноҳия  сохтмони  18 иншоот  ба итмом расид.