Пардохти 1 миллион рубл ба муҳоҷирони меҳнатӣ

Душанбе, 22.04.2014. (АМИТ «Ховар, Лайло Тоирӣ). —  Бо  мадади Намояндагии  Вазорати  меҳнат,  муҳоҷират ва  шуғли  аҳолии  ҶТ  дар  ФР  тайи   моҳи  апрели  соли  ҷорӣ қарзи  маоши муҳоҷирони  меҳнатӣ, ки  беш  аз 1  миллиону  130  ҳазор  рублро ташкил  медод,  пардохта  шуд.  Дар  ин  бора  аз   Намояндагии  Хадамоти  муҳоҷирати  ҶТ  дар  ФР  ба  АМИТ «Ховар»  хабар  доданд. 
Мувофиқи  суханони  манбаъ,  қариб  нисфи  ин  маблағро  қарзи  маоши  гурӯҳи  сохтмончиёни  тоҷик, ки  дар  ҳайати  яке  аз  ширкатҳои  сохтмонии  шаҳри Санкт – Петербург  кор  мекарданд,  ташкил  дод. 
Ғайр  аз  ин  бо мусоидати  намояндагӣ қарзи  маоши муҳоҷирони  меҳнатии Тоҷикистон, ки дар  шаҳрҳои  Новосибирск ва  Маскав кор  мекунанд, пардохта  шудааст.
Таҳлили муроҷиати муҳоҷирони  меҳнатӣ  нишон  медиҳад, ки  сабаби  асосии  пардохт  нашудани  маоши  онҳо адами   созишномаҳои  меҳнатии байни   корфармоён  ва муҳоҷирони  меҳнатӣ  мебошад.