Паём: Созмони Ҳамкориҳои Шанхай мавқеи хосса дорад
Душанбе, 16.04.2014. (АМИТ «Ховар», Мавҷуда Анварӣ).- Сардори Давлат Эмомалӣ Раҳмон дар Паёми соли 2012 ба Маҷлиси Олӣ зикр намуд, ки ҳама нияту ҳадафҳои мо на танҳо ба нафъи кишвари худамон, балки ба манфиати ҳамаи ҳамсоягон, ҳамаи шарикони минтақавии мо мебошанд ва бо нақшаву мақсадҳои минтақавӣ ҳамоҳангиву созгории комил доранд. Мо танҳо ба манфиати худ ва бар зарари касе кор карданӣ нестем, балки сидқан тарафдори ҳамкориву ҳамшарикии баробарнафъи минтақавӣ ҳастем.
Замоне, ки қисматҳои мухталифи дунё ба ҳам меоянд, созмонҳои минтақавӣ ва фаромиллӣ ташкил медиҳанд, то зиндагии якдигарро осон намоянд, дар минтақаи мо аз ҳам гусастани робитаҳо, бастан ва шикастани роҳҳо, паси ҳам барои якдигар эҷод намудани монеаҳо аз рӯи инсоф нест. Мо бошем, умедворем, ки ҳикмати анъанавии аҷдоди барӯмандамон, ки асрҳо ҳамзистии дӯстонаву бародарона доштанд, ғолиб хоҳад омад!
Тоҷикистон дар муносиботи худ бо дигар кишварҳо ва минтақаҳои дунё айни ҳамин усулҳо ва ҳадафҳоро пеш гирифтааст. Кишвари мо узви чандин созмонҳои минтақавию байналмилалӣ дар ҷанубу шарқ ё ҷанубу ғарби Осиёи Марказист.
Дар байни онҳо, албатта, Созмони Ҳамкориҳои Шанхай мавқеи хосса дорад, чунки ҳар яки шумо дар бораи лоиҳаҳое, ки дар чаҳорчӯби ҳамкорӣ бо ин созмон татбиқ мешаванд, иттилоъ доред.
Ҳам дар ин ҷода ва ҳам дар масоили амниятиву сиёсӣ мо ҳамкориҳои худро бо аъзои он ва қабл аз ҳама, Ҷумҳурии Мардумии Чин рушду густариши тоза хоҳем бахшид.
-Нисбат ба дигар ниҳоду созмонҳо, ки зикрашон дар боло рафт, мо ҳамеша бо аъзои онҳо низ дар бораи ҳадафҳои созанда, ки мақсади ниҳоияшон беҳтар намудани сатҳи зиндагии мардум аст, суҳбат мекунем.
Бунёд намудани роҳҳои нави оҳану мошингард, қубурҳои нафту газ, хатҳои нави барқ натиҷаи ҷустуҷӯҳо ва дарёфтҳое ҳастанд, ки ҳадафи татбиқи ин нақшаҳои созанда ғайр аз муҳайё намудани зиндагии орому осуда ва беҳтару хубтар барои мардумони мо чизи дигаре нест,-таъкид намуд Президенти мамлакат Эмомалӣ Раҳмон аснои ирсоли Паём ба МО ҶТ.