Паём: Ятимони куллро дар муҳити оила тарбия намоед

Душанбе, 23.04.2014. (АМИТ «Ховар», Мавҷуда Анварӣ). —  Имрӯз Сарвари Давлат Эмомалӣ Раҳмон дар Паёми худ  ба Маҷлиси Олии Ҷумҳурии Тоҷикистон иброз намуд, ки оила ҳамчун падидаи иҷтимоиву ҳуқуқӣ маҳаки асосии ҷамъиятро ташкил дода, дар сатҳи Конститутсияи кишвар барои ҳифзи он ва таҳти ғамхории махсуси давлат фаро гирифтани модару кӯдак аз ҷониби Ҳукумати кишвар ҳамаи чораҳои зарурӣ андешида мешаванд. Бинобар ин, зарурат ба миён омадааст, ки бо назардошти ҳифзи ҳуқуқу манфиатҳои қонунии кӯдак ба Кодекси оила дар хусуси фарзандхонӣ тағйиру иловаҳо ворид шуда, ҳамзамон бо ин, низоми қонунгузории оилавӣ такмил дода шавад.
Эмомалӣ Раҳмон ба аҳли нишаст муроҷиат кард, ки ятимони куллро дар муҳити оила тарбия кардан ҳам беҳтар ва ҳам савоби бузург аст. Тасаввур кунед, ки агар беш аз сеюним ҳазор ятимони кулл як нафарӣ ба муҳити оила фаро гирифта шаванд, чӣ қадар оилаҳо соҳиби фарзанд ва хушбахт мегарданд.