Садамаи нақлиётӣ бо оқибатҳои фалокатбор

Душанбе, 19.04.2014. (АМИТ «Ховар», Муқаддас Темурзода).- Дирӯз  ронандаи мошини тамғаи «Камаз»-5511», шаҳрванд Муртазо Исматуллоев, соли таваллудаш 1989, истиқоматкунандаи ноҳияи Хуросон, ҳангоми ҳаракат аз тарафи шаҳри Душанбе ба самти шаҳри Қурғонтеппа дар ҳудуди ноҳияи Бохтар, ба тарафи чапи роҳ гашта, ба мошини тамғаи «Opel — Astra», таҳти идораи ронанда Маҳмадризо Маҳмадуллоев, соли таваллудаш 1964, истиқоматкунандаи ноҳияи Ҷалолиддин Румӣ,  ки бо роҳи худ аз тарафи шаҳри Қурғонтеппа ба самти шаҳри Душанбе ҳаракат мекард, бархӯрд.
Тавре ки маркази мабуоти ВКД хабар медиҳад, дар натиҷаи садама, мусофири мошини «Opel-Astra» Алмира Бахибекова, соли таваллудаш 1966, сокини ноҳияи Румӣ дар ҷои ҳодиса ба ҳалокат расида, мусофирони дигари мошини мазкур Неъмат Қобилов, соли таваллудаш 1961, сокини ноҳияи Ҷилликул ва Абдулҳаким Муродов, соли таваллудаш 1967, сокини ноҳияи Ҷ.Румӣ  ҷароҳатҳои гуногуни ҷисмонӣ бардошта, дар беморхона бистарӣ гардиданд.
Ронандаи мошини сабукрави  «Opel — Astra» М.Маҳмадуллоев ва мусофири он У.Сафаров дар беморхона ба ҳалокат расиданд.