Семинар ҷиҳати кор бо барномаи i2 дар Қазоқистон

Душанбе, 05.04.2014. (АМИТ «Ховар», Мавҷуда Анварӣ). —  Дар чорчӯбаи лоиҳаи «Системаи ҳифзи ҳуқуқ барои ҷамъоварӣ, таҳлил ва мубодилаи иттилооти фаврӣ дар соҳаи мубориза бар зидди маводи нашъаовар», ки аз тарафи Намояндагии минтақавии раёсати Созмони Милали Муттаҳид оид ба маводи нашъаовар ва ҷинояткорӣ бо дастгирии Бюрои назорати маводи нашъаовар ва ҳифзи тартиботи (INL) Сафорати ИМА дар Ҷумҳурии Қазоқистон амалӣ мегардад, дар шаҳри Алмаато дар заминаи Маркази минтақавии ҳамоҳангсозии иттилоотии Осиёи Марказӣ (ЦАРИКЦ) аз 31 март то 4 апрели соли 2014 семинари амалӣ доир ба омӯзиши таҷрибаи пешоҳанг бо истифодаи барномаи i2 (“Analyst’s Notebook” ва “iBase”) баргузор гардид.
Дар кори семинар сардори шуъбаи иттилоотӣ-таҳлилии Агентии назорати маводи нашъаовари назди Президенти ҶТ Ю. Чикалов ба ҳайси мураббӣ иштирок намуд.
Дар машғулият намояндагони Агентии назорати маводи нашъаовари назди Президенти ҶТ, Вазорати корҳои дохилӣ ва Хадамоти давлатии назорати маводи нашъаовари назди Ҳукумати Ҷумҳурии Қирғизистон бо ҳампешагони худ аз мақомоти салоҳиятдори Қазоқистон мубодилаи малака ва таҷрибаи корӣ намуданд. Онҳо имкониятҳои барномаи i2-ро ҳангоми гузаронидани таҳлили гуфтугӯи телефонӣ ва транзаксияи пулӣ намоиш доданд.