Шиносоӣ бо планетарияи ҷумҳуриявӣ

Хуҷанд, 15.04.2014. (АМИТ “Ховар”, Абдуаҳад Шарифзода).- Дирӯз зиёда аз 150 нафар тарбиятгирандаи гурӯҳҳои омодагӣ ба мактаби Муассисаи давлатии “Кӯдакистони Президенти”-и шаҳри Хуҷанд аз планетарияи ҷумҳуриявии ба номи Абӯмаҳмудӣ Хуҷандии маркази вилоят, ки дар Осиёи Миена ягона ба ҳисоб меравад, дидан намуд. 
Тавре ки масъулин иброз доштанд, зимни боздид кӯдакон бо  қоидаҳои илми нуҷум ва асрори осмони ситоразор шинос шуданд, ки ин барои онҳо бисёр ҳам шавқовару хотирмон буд. Инчунин пас аз шиносоӣ бо осмони ситоразор ва тамошои намоиш-филми “Аввалин парвози инсон” дар саҳни планетария  (майдони махсусе, ки дар он ҷо ҳаракати ситораҳоро намоиш медиҳанд), озмуни расмкашӣ таҳти унвони «Кайҳон аз нигоҳи кӯдакон» баргузор шуд. 
Бояд гуфт, ки тарбиятгирандагони кӯдакистони президентӣ на танҳо иштирокчиёни фаъоли  чорабиниҳои дохилӣ, балки озмунҳои шаҳриву вилоятӣ низ ҳастанд.