Собиқадорони ҶБВ кӯмакпулӣ мегиранд

Душанбе, 28.04.2014. (АМИТ «Ховар,  Екатерина  Пасторова). — Раёсати пойтахт ба ҳар  нафар иштироккунандагон  ва  маъюбони  Ҷанги  Бузурги  Ватанӣ баробари 900 сомонӣ кӯмакпулии  якдафъаина медиҳад.
Раиси  шаҳри  Душанбе  Маҳмадсаид  Убайдуллоев  ба  Раёсати  молияи   шаҳр  дастур  додааст, ки  аз хазинаи   захира барои  ин  мақсад  беш  аз 714  ҳазор  сомонӣ  ҷудо  кунад. 
Аз  ҷумлаи  ин  маблағ  ба  ҳар  нафар  иштироккунандагони муҳосираи  Ленинград, шахсони  дорои  мукофотҳо  барои  меҳнат дар  ақибгоҳ,  маъюбони  амалиётҳои  ҳарбӣ  дар  кишварҳои  дигар,  иштироккунандагони  рафъи садамаи нерӯгоҳи  атомии Чернобил,  ҳамчунин хонаводаҳои   шахсоне, ки  ҳангоми  муҳофизати  сохти  конститутсионӣ ҳалок шудаанд,  650  сомонӣ  дода  мешавад.
Гуфта  мешавад, ки  кӯмакпулиҳо то  7  майи  соли ҷорӣ  дастрас  мегарданд.
Дар  ин  бора  Хадамоти  матбуоти раёсати  шаҳри  Душанбе  хабар  медиҳад.