Суғд: тақдими сипосномаҳо ба иқтисодчиёни собиқадор

Душанбе, 12.04.2014. (АМИТ «Ховар», Зарангези Латиф).- Дирӯз дар  Раёсати молияи вилояти Суғд бахшида ба Рӯзи иқтисодчиён маросими супоридани «Сипоснома» — ҳои мақомоти иҷроияи ҳокимияти давлатии вилоят ба иқтисодчиёни собиқадор баргузор гардид.
Анвар Яъқубӣ, муовини раиси вилояти Суғд иқтисодчиёнро аз номи раиси вилоят Абдураҳмон Қодирӣ бахшида ба иди касбиашон табрик гуфта, нақши онҳоро дар пешбурди ҳаёти ҷомеа муассир арзёбӣ кард. Ӯ ҳамчунин афзуд, ки мақомоти иҷроияи ҳокимияти давлатии вилоят рушди  иқтисодро аз самтҳои муҳими фаъолият арзёбӣ карда, таъмини рушди устувор ва самарабахши онро дар  доираи ҳадафҳои стратегӣ ва барномаҳои давлатию маҳаллӣ асоси фаъолияти худ қарор дода, барои тақвияти неруи инсонӣ ва зина ба зина баланд бардоштани сатҳу сифати зиндагии мардум  тадбирҳои муассир меандешад.
Ба иттилои дафтари матбуоти раиси вилоят ба 13 нафар собиқадорони соҳаи иқтисод, аз ҷумла Абдураҳмон Зоидов, Абдусалом Абдусамадов, Анварҷон Дадоҷонов, Зайнура Шарифова, Шаҳодат Тоҳирова ва дигарон барои фаъолияти пурсамар сипосномаҳои мақомоти иҷроияи ҳокимияти давлатии вилоят супорида шуд.