Тайёрӣ ба ҷаласаи Комиссияи байниҳукуматӣ

Душанбе, 09.04.2014. (АМИТ «Ховар, Кристина  Эрлих). – Тайёрӣ ба  ҷаласаи  дуюми  пешорӯи  Комиссияи  байниҳукуматии   Тоҷикистону  Швейтсария  оид ба  ҳамкории  тиҷоратию  иқтисодӣ, ки  ба  нимаи  дуюми  соли  ҷорӣ  пешбинӣ  шудааст,  ҳамчунин  доир  намудани  форуми  соҳибкорону  тоҷирон  бо  иштироки   соҳибкорони  ҳар  ду  кишвар дар  ҳошияи  ин  чорабинӣ  мавзӯъҳои  асосии  мулоқоти  вазири рушди  иқтисод  ва  савдои  ҶТ Шариф  Раҳимзода бо  узви раёсати  Кумитаи иҷроияи  Палатаи  муттаҳидаи  савдои  Швейтсария  ва СММ  Юрий Морару   қарор  доштанд. Дар  ин  бора  аз маркази  матбуоти  Вазорати  рушди  иқтисод  ва  савдои  ҶТ  ба АМИТ  «Ховар»  хабар  доданд.  
Ҷонибҳо  дар  ҷараёни  мулоқот  дурнамои  ҳамкории  иқтисодии  байни  ҳар  ду  кишвар  дар  бахшҳои  кишоварзӣ,  нақлиёт,  сохтмони  роҳу  нақбҳо,  саноати  сабук,  маводи  сохтмонӣ  ва рушди  сайёҳиро  мавриди  муҳокима  қарор  доданд.  Хотирнишон  месозем, ки  ҷаласаи  якуми  Комиссияи  байниҳукуматии  Тоҷикистону  Швейтсария  оид ба  ҳамкории  тиҷоратию  иқтисодӣ  5 – 6  марти  соли  2013  дар  шаҳри  Душанбе  баргузор  шуда буд. 
Мувофиқи  маълумоти  омори  расмӣ, соли  гузашта  муомилоти  савдои  хориҷии  байни  ҳар  ду  кишвар  83  миллиону  244  ҳазору 100  доллари  ИМА – ро ташкил  дод. 
Қисмати  амволи  воридотӣ  аз  Швейтсария  ба  Тоҷикистон  иборат  аз  дорувор, моддаҳои  рангкунанда,  сафеда,  маҳсулоти  кимиёвӣ, ҳамчунин  қисмҳои  эҳтиётии  мошинҳо  ва  ташҷҳизот  аст.