Таваллудхонаи нав дар канори Ғунд

Хоруғ, 9.04.2014. (АМИТ «Ховар», Файз Мирасан).- Назар ба қавли масъулини Дирексияи сохтмони иншооти ҳукуматии назди  дастгоҳи Президенти Ҷумҳурии Тоҷикистон қарор аст бинои нави таваллудхонаи шаҳри Хоруғ дар даҳаи дуюми моҳи июн мавриди истифода қарор гирад. Бино дуқабата буда, дар канори рӯдхонаи Ғунд ҷо гирифтааст.
Раиси вилоят Шодихон Ҷамшед  зимни боздид аз ин иншоот дастур дод, ки то анҷоми корҳои сохтмонӣ атрофи бино  бояд пурра тоза карда шавад ва роҳи мошингард омода   гардад. Таваллудхонаи вилоятӣ сохтори  мустақил мешавад. Тибқи лоиҳаи сохтмонӣ дар ин бино чор утоқи ҷарроҳӣ,утоқҳои табобатӣ барои зиёда аз 50 кат дар як вақт ва маъмурияти он ҷо дода мешаванд. 
Ба сардори Раёсати тандурустӣ ва ҳифзи иҷтимоии вилоят супориш дода шуд, ки роҳбарияти таваллудхона ба корҳои ободонӣ дар ин мавзеъ ҷалб шаванд. Таъкид гардид, ки дар корҳои ободонӣ ва кабудизоркунии ин мавзеъ  кормандони  тамоми сохторҳои раёсати тандурустӣ  бояд ҳиссагузор бошанд. 
Ҷиҳати таъмини бино бо қувваи барқ ва ба талабот ҷавобгӯ намудани хатти интиқоли  нерӯи барқ, ки аз ин мавзеъ мегузарад, ба масъулини ширкати барқии «Помирэнерҷӣ» дастур дода шуд, ки бо истифода аз имкониятҳои мавҷуда тадбирҳои амалӣ андешанд.