Вазъи Меҳнатободи Хуросон муътадил аст

Қӯрғонтеппа, 22.04.2014. (АМИТ «Ховар», Мурод Сотиев).- Дар айни ҳол  вазъият  дар  деҳаи Меҳнатободи ноҳияи  Хуросон  муътадил буда,  корҳои барқароркунӣ идома доранд. Тавре  ки ба  АМИТ  «Ховар»  сардори Ситоди  ҳолатҳои фавқулодаи  вилояти Хатлон  Ҳотамшо  Шарипов  иттилоъ  дод, баъди 20-25  дақиқаи офати табиии  рӯзи 16  апрели  соли ҷорӣ ҳайати шахсӣ ва  гурӯҳи наҷотдиҳандагони  Ситоди  ҳолатҳои фавқулодаи  вилоят ба  ҷои ҳодиса  омаданд. Барои иҷрои корҳои наҷотдиҳӣ  сарбозон  ҷалб шуда, бо истифода аз қаиқҳо  ва  техника  одамон ба  ҷойҳои бехавф  бароварда шуданд.
Ба иттилои  манбаъ, ҳоло  бо истифода  аз қувваи ситоди ҳолатҳои фавқулода 133  хона пурра  аз лой ва  санг  тоза  шудааст. Бо кумаки мақомоти  иҷроияи  ҳокимияти давлатии  вилояти Хатлон масъалаи дастрас кардани маводи хӯрокӣ пурра  ҳалли  худро ёфтааст. Ҳолати оилаҳои алоҳида  омӯхта шуда, онҳо бо ҷиҳози лозимӣ таъмин   мешаванд. Як қисми  аҳолӣ барои фароҳам  овардани шароити  хубтар ба хонаҳои наздикони худ кӯчонида шуданд ва  ба тақсим кардани хаймаҳо эҳтиёҷ нест.
Муовини аввали  раиси  ноҳияи  Хуросон Сайхуҷа Каримов гуфт, ки бо дастгирии  ҷамоатҳои деҳоти ноҳия дар мавзеи Меҳнатобод ҳашари умуминоҳиявӣ  ташкил шудааст ва  оқибатҳои офати табиӣ  бартараф  шуда истодаанд. Баровардани лой ва санг аз  ҳавлиҳо қариб ба охир мерасад ва  рангуборкунии  хонаҳо идома дорад. Ба гуфтаи Сайхуҷа Каримов  дар мавзеи аз офат зарардида 7 хона қисман ва 4 хона пурра  зарар дидааст. Аҳолии зарардида ба  ҷойҳои бехавф кӯчонида шуда, эҳтиёҷе барои хаймаҳо вуҷуд надорад. Барои барқарор  кардани  манзилҳои зарардида  аз захираҳои молии  ноҳия  маблағҳо ҷалб мешаванд.