Восеъ: Зарари офати табиӣ бартараф мешавад
Восеъ, 14.04.2014. (АМИТ «Ховар», Сулаймони Хол).-Боронҳои пай дар пайи шаби 12-уми апрели соли ҷорӣ ба аҳолии ҷамоати Тугараки ноҳияи Восеъ низ зарари ҷиддӣ расонид ва дар натиҷа як нафар ба ҳалокат расида, 250 хоҷагӣ зиён дида, 130 сар чорвои шохдори калон ва моли майдаи хонагӣ талаф ёфт. Инчунин заминҳои корами кишоварзӣ хароб шуданд, ки комиссияи махсуси мақомоти давлатӣ дар айни замон хисороти расидаро муайян менамояд. Хисороти расида бештар дар деҳаҳои ҷамоати Тугарак ба кайд гирифта шуд, ки корҳои бартарафкунӣ ва барқарорсозӣ бо дастгирии Ҳукумати ҶТ, мақомоти иҷроияи ҳокимияти вилояти Хатлон ва ситоди ҳолатҳои фавқулода ва мудофиаи гражданӣ бо ҷалби техникаҳои лозимӣ идома доранд.
Мавриди зикр аст, ки офати табиӣ ба се деҳаи ҷамоати деҳоти Зарбдор хисорот оварда, дар натиҷа 30 хонаи истиқоматӣ қисман зарар дида, 15 сар чорвои калони шохдор ва 160 сар моли майда талаф ёфтааст.
Ҳамчунин омадани сел ба сокинони деҳаҳои Ғарабдара, Шулулу ва Боғиҳабиби ҷамоати деҳоти Балхобии ноҳияи Муъминобод хисорот овард, ки дар натича 23 иншооти ёрирасони хоҷагӣ, 800 м роҳи мошингард ва кӯпрукҳои байни деҳаҳо, 3 км хати оби нӯшокӣ, як бунгоҳи тиббӣ, 57 сар чорвои хурду калони хонагӣ талаф ёфт.
Дар айни хол бо супориши роҳбарияти ситоди ҷумҳуриявӣ дар ноҳияҳои Шӯрообод, Восеъ, Кӯлоб, Муъминобод, ки аз офати табиӣ зарар дидаанд, комиссияи давлатӣ фаъолият дошта, барои рафъи оқибатҳои офати табиӣ тамоми техникаҳои заруриро сафарбар намудаанд.