Ғолибияти Акбархӯҷа дар олимпиадаи байналмилалӣ
Душанбе, 30.05.2014. (АМИТ «Ховар», Раъно Нусратуллозода).- Донишҷӯи соли дуюми ихтисоси географияи сайёҳӣ ва менеҷменти саёҳати факултаи география ва экологияи Донишгоҳи давлатии Хуҷанд ба номи академик Бобоҷон Ғафуров Акбархӯҷа Саидалиев аз миёни 11 нафар довталаби озмуни байналхалқии донишҷӯёни макотиби олии мамлакатҳои Осиёи Марказӣ соҳиби ҷои аввал ва сертификат гардид.
Тавре ки декани факултаи география ва экологияи донишгоҳ Муъминҷон Аминов иттилоъ дод, дар шаҳри Алмаато бо ташаббуси Донишгоҳи Қазоқистонию Олмонӣ озмуни байналмилалӣ таҳти унвони «Идоракунии самаранокии сарватҳои обӣ дар Осиёи Марказӣ баргузор гардид ва дар он 11 нафар довталаб аз давлатҳои Қазоқистон, Қирғизистон, Тоҷикистон Ӯзбекистон ва Афғонистон ширкат варзид. Акбархӯҷа Саидалиев дар 5 марҳилаи саволҳо, ки бештар дар бораи қонуну конвенсияҳо оид ба об, сифати об, тағирёбии иқлим ва об, энергетика ва об, хоҷагии қишлоқ ва об буда, беш аз 100 саволро дар бар мегирифт, ҷавобҳои мушаххас дода, соҳиби ҷои аввал ва диплом гардид.