Қабули фаъолияти бонкдории исломӣ
Душанбе, 16.05.2014. (АМИТ «Ховар», Лайло Тоирӣ).- Бино ба маълумоти хадамоти матбуоти Бонки миллии Тоҷикистон, 14 майи соли равон вакилони Маҷлиси намояндагони Маҷлиси Олии Ҷумҳурии Тоҷикистон лоиҳаи Қонун дар бораи “Фаъолияти бонкдории исломӣ”-ро тасдиқ намуданд.
Зимни муаррифии лоиҳаи қонуни мазкур раиси Бонки миллии Тоҷикистон Абдуҷаббор Ширинов зикр намуд, ки пас аз буҳрони молиявию иқтисодие, ки аз соли 2009 тамоми дунёро фаро гирифта буд, тарзи кори бонкдории исломӣ, ки ин буҳронро муваффақона паси сар намуд, диққати аксар созмонҳои пешқадами молиявии ҷаҳонро ҷалб намуд.
Бо назардошти ин таҷрибаи пешқадам аксари мамлакатҳои олам, аз ҷумла Иттиҳоди Аврупо, ИМА, Чин, Русия, Озарбойҷон, Қирғизистон ва Қазоқистон усули бонкдории исломиро дар низоми бонкии кишварҳои худ ҷорӣ намуданд.