Қабули Изҳороти сеҷонибаи ҷамъбастии Ташаббуси АҚТ

Душанбе, 29.05.2014. (АМИТ «Ховар», Мавҷуда Анварӣ). -Имрӯз дар Китобхонаи миллӣ ҷаласаи сеҷонибаи роҳбарони сохторҳои зиддимухаддиротии «Ташаббуси АҚТ»-Афғонистон, Қирғизистон ва Тоҷикистон баргузор гардид. Мақсади асосии чорабинӣ-муттаҳид намудани кӯшишҳои се кишвар дар мубориза бар зидди интиқоли маводи нашъаовар аз рӯи «хатсайри шимолӣ», инчунин мубодилаи иттилооти фаврӣ ва масъалаҳои омода намудани кадрҳо мебошад. 
Аз рӯи натиҷаи ҷаласа Изҳороти сеҷонибаи ҷамъбастии Ташаббуси АҚТ қабул карда шуд. Дар ҳуҷҷат зикр гардидааст, ки истеҳсоли маводи нашъаовар дар Афғонистон ва зиёд шудани талабот ба он, хатари иловагиро ба минтақа ва берун аз он эҷод менамояд, инчунин мустаҳкам намудани ҳамкорӣ ва андешидани тадбирҳои навро барои муқовимат бар зидди муомилоти ғайриқонунии маводи нашъаовар ва қочоқи прекурсорҳо талаб менамояд.
Дар вохӯрӣ инчунин «Нақшаи чорабиниҳо оид ба таҳия намудани Изҳороти вазоратӣ, ки дар чорчӯбаи вохӯрии сеҷонибаи вазирон-роҳбарони идораҳои зиддимухадиротии Афғонистон-Қирғизистон-Тоҷикистон қабул гардид», ба имзо расид.