Ҳаҷми ММД ба 7,8 млрд. сомонӣ баробар шуд

Душанбе, 06.05.2014. (АМИТ «Ховар», Лайло Тоирӣ).- Бино ба иттилои хадамоти матбуоти Бонки миллии Тоҷикистон, вазъи иқтисодиёти кишвар дар моҳҳои январ-марти соли 2014 сарфи назар аз коҳиши рушди иқтисодиёт дар кишварҳои шарикони савдо ва ноустувории нархҳо дар бозорҳои молиявии ҷаҳон дар сатҳи нисбатан муътадил қарор дошт. Ҳаҷми Маҷмӯи маҳсулоти дохилӣ дар ин давра ба 7,8 млрд. сомонӣ баробар шуда, суръати рушди воқеии он 7 фоизро ташкил намуд. Рушди бештар дар бахшҳои асосии иқтисодиёти кишвар, аз ҷумла, сохтмон — 38,1 фоиз, истеҳсоли маҳсулоти кишоварзӣ — 13,6 фоиз, гардиши савдои чакана — 13,1 фоиз, саноат — 3,6 фоиз ва хизматрасонӣ — 3,4 фоиз ба қайд гирифта шуд. Дар семоҳаи аввали соли 2014 раванди нисбатан номуътадили сатҳи нархҳои маҳсулоти воридотӣ ҳамчун омили беруна ва болоравии нархи маҳсулоти ниёзи мардум (картошка, сабзӣ, пиёз ва маҳсулоти гӯштӣ) ҳамчун омили мавсимӣ ба болоравии сатҳи таваррум таъсир расонид. Дар натиҷа ин нишондиҳанда 2,4 фоизро ташкил дод, ки дар муқоиса ба ҳамин давраи соли қаблӣ 1,2 банди фоизӣ зиёд аст.