Ҳангоми оббозӣ эҳтиётро фаромӯш накунед

    Душанбе, 27.05.2014. (АМИТ «Ховар», Лайло Тоирӣ).- Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон ба диққати шаҳрвандон ва меҳмонони Ҷумҳурии Тоҷикистон мерасонад, ки бо баланд шудани ҳарорати ҳаво ва оғози мавсими шиноварӣ дар дарёҳо обанборҳо, каналҳо ва ҳавзҳо, ки ба эҳтимоли ғарқшавии шаҳрвандон таҳдид  мекунад, эҳтиёткор бошанд. 
          Сардори   Маркази   матбуоти кумита Ориф Нозимов гуфт, ки бар асари риоя накардани қоидаҳои бехатарии шиноварӣ  дар соли 2013 -124 нафар шаҳрванд ғарқ шуд, ки ин боиси ташвиши кормандони кумита  гашт. 
          Бо мақсади пешгирии ҳодисаҳои нохуш кумита аз шаҳрвандон ва меҳмонони Ҷумҳурии Тоҷикистон хоҳиш дорад, ки барои ҳимояи ҳаёти худ ва наздикон, ҳангоми истироҳату шиноварӣ дар наздикии дарёҳо, каналҳо ва обанборҳо қоидаҳои бехатарии рафтор дар обро риоя намоянд ва аз оббозӣ дар ҷойҳои манъшуда ва дарёҳои тезҷараён худдорӣ намоянд. Ҳангоми истироҳат дар наздикии иншоотҳои обӣ ноболиғонро беназорат нагузоранд.