150 нафар донишҷӯй пешхизмат мешавад

Душанбе, 26.05.2014. (АМИТ «Ховар», Лайло Тоирӣ).-Тавре ки маълум аст,  11-12 сентябри соли 2014 дар пойтахти Ҷумҳурии Тоҷикистон шаҳри Душанбе вохўрии навбатии сарони Созмони Ҳамкориҳои Шанхай   баргузор хоҳад гардид.
Аз ин рў бо ибтикори Агентии меҳнат ва шуғли аҳолии Вазорати меҳнат, муҳоҷират ва шуғли аҳолии Ҷумҳурии Тоҷикистон дар Муассисаи давлатии Маркази таълими калонсолони Тоҷикистон барои пазироӣ ва хизматрасонӣ дар вохӯрии сарони давлатҳои узви Ҳамкориҳои Шанхай ва намояндагони ин созмони бонуфузи дунё омодагиҳо ҷараён доранд.
Бино ба иттилои сармутахассиси шуъбаи робитаҳои байналмилалӣ ва ҷамъиятии дастгоҳи марказии Агентии меҳнат ва шуғли аҳолӣ Рустамҷон Умаров, барои дар сатҳи касбӣ пазироӣ намудани меҳмонон, аз ҳисоби донишҷӯёни муассисаҳои таҳсилоти олии касбии ҷумҳурӣ бо теъдоди 150 нафар ҷавондухтару ҷавонписар, аз ҷумла 110 нафар донишҷӯи Донишкадаи тиҷорати Тоҷикистон, 20 нафар аз  Донишкадаи давлатии забонҳои Тоҷикистон ба номи Сотим Улуғзода ва 20 нафар аз Донишгоҳи технологии Тоҷикистон ба муҳлати 2 моҳ барои омӯзиши касби пешхизмат дар Маркази мазкур ба омўзиш фаро гирифта шудаанд.