А. Қодирӣ: Хона ва мошин ба барандаи медали тиллоӣ

Душанбе, 22.05.2014. (АМИТ «Ховар, Мавҷуда Анварӣ). -Дар варзишгоҳи «20-солагии Истиқлолият»-и вилояти Суғд бо иштироки раиси вилоят Абдураҳмон Қодирӣ ба муносибати Рӯзи ҷавонон чорабинии идонаи бошукӯҳ баргузор гардид. А. Қодирӣ гуфт, таҷлили бошукӯҳи Рӯзи ҷавонон, ки ҳамасола 23 май барпо мегардад, дар таърихи навини Тоҷикистони соҳибистиқлол бо дастовардҳои азими меҳнатии аҳли ҷомеа, бахусус ҷавонон, ки ба сӯи ояндаи неку дурахшон қадамҳои боэътимод мегузоранд, нақши муниру барҷаста дорад.Абдураҳмон Қодирӣ инчунин аз нақши варзишгарони номии вилояти Суғд, ки дар арсаи ҷаҳонӣ шарафи Тоҷикистонро ҳимоя мекунанд, ситоиш намуд. Ӯ гуфт, бо мақсади ҳавасмандкунии варзишгарон барандагони медалҳои Бозиҳои олимпӣ, ки соли 2016 дар Рио-де-Женейрои Бразилия доир мегарданд, бо туҳфаҳои арзанда қадршиносӣ мешаванд. Аз ҷумла, барандаи медали тиллои олимпиадаи Рио-де-Женейро соҳиби хонаи истиқоматии сеҳуҷрагӣ ва мошини сабукрави «Toyota Camry», барандаи медали нуқра соҳиби хонаи истиқоматии сеҳуҷрагӣ ва барандаи медали биринҷӣ дар ин олимпиада соҳиби мошини сабукрави «Toyota Camry» мегардад.Дар ин рӯз ҳамчунин ба иштирокчиёни ҳафтаи худидоракунӣ гувоҳномаҳо ва ба гирандагони стипендияҳои раиси вилоят идрорпулиҳо супорида шуданд.