Амалиёти зиддинашъамандии «Роҳи қапқони ҷанубӣ»

Душанбе, 27.05.2014. (АМИТ «Ховар», Некрӯзи Муҳаммадсодиқ).- Имрӯз,  27 май  дар машқгоҳи «Лоҳур» ҷамъбасти натиҷаҳои амалиёти махсуси зиддинашъамандии маҳаллии «Роҳи қапқони ҷанубӣ» баргузор гардид, ки он аз 20 то 25 майи соли 2014 дар Тоҷикистон идома дошт. Дар маросими ҷамъбасти натиҷаҳо муовини директори Агентии назорати маводи нашъаовари назди Президенти кишвар полковник Маҳмудов Х.Х., директори Хадамоти федеролии Русия оид ба назорати гардиши маводи мухаддир Виктор Иванов, котиби генералии СААД Николай Бордюжа иштирок намуданд.
Раёсати кофтукови ҷиноии штаби ҳамоҳангсози байналмилалӣ оид ба роҳбарии амалиёт дар асоси Агентии назорати маводи нашъаовари назди Президенти Тоҷикистон кушода шуд, ки ба ҳайати он намояндагони Арманистон, Беларус, Қазоқистон, Қирғизистон, Русия ва Тоҷикистон шомиланд.
Ҳадафи амалиёт ҳалли вазифаҳои амалӣ оид ба пойдории вазъи нашъамандӣ дар минтақаҳои Осиёи Марказӣ, дар навбати аввал дар Тоҷикистон, пешгирӣ намудани фаъолияти гурӯҳҳои нашъаҷаллоби фаромиллӣ, ҳудуди истифодашудаи Тоҷикистон барои қочоқи маводи мухаддири Афғонистон ба ҳудуди давлатҳои аъзои СААД, аз  ҷумла кишварҳои иштирокчии Иттиҳоди гумрукӣ мебошанд.
Ба мақомоти ҳифзи ҳуқуқи кишварҳои иштирокчӣ муяссар гардид, ки роҳҳои интиқоли ғайриқонунии маводи мухаддирро  маҳкам намоянд. Аз гардиши ғайриқонунии маводи мухаддир 12 тоннаю 450 кг нашъа  мусодира гардид, ки  10 тоннаю 324 кг-и онро афюн, 902 кг ҳашиш , беш аз 425 кг героин, 19 кг маводи мухаддири синтетикӣ, 669 кг-ро марихуана ташкил медиҳад.